الرئيسية
أحدث الصور
التسجيل
دخول
من طرف فى الزمالك من سنين وفى حمى النيل القديم
قصر من عصر اليمين ،ملك واحده من الحريم
صيتها أعلى من الآذان ، يسمعوه المسلمين
والتتر والتركمان ، والهنود والمنبوذين
ست فاقت ع الرجال فى المقام والاحترام
صيت وشهرة وتل مال يعنى فى غاية التمام
قصره يعنى هيه كلمه ، ليها كلمة فى الحكومة
بس ربك لجل حكمة قام حرمها م الأمومة
والأمومة طبع ثابت جوا حواء من زمان
تعمل ايه الست جابت فوكس رومى وله ودان
فوكس ده عقبال أملتك عنده دستة خدامين
يعنى مش موجود فى عيلتك شخص زيه يااسماعين
واسماعين ده يبقى واحد من الجماعه التعبانين
اللى داخوا فى المعاهد والمدارس من سنين
حب يعمل واد فكاكة ويمشى حبه فى الزمالك
والقيامه والفتاكه يرموا طبعا ع المهالك
عم سمعه من قيامته حب يعمل فيها فله
بعد ما الوظ بيجامته اشترى حته مجله
قول مشى يقرا حكاية من حكايات الغرام
واندماجه فى القرايه خلى مشيه مش تمام
ع اليمين يحدف بعيد خطوتين ويروح شمال
لمحه فوكس من الحديد قال دا صيد سهل وحلال
هوب نط فى كرشه دوغرى جاب بيجامته لحد ديلها
اسماعين بدل ما يجرى قال يارجلى رجلى مالها
بص شاف الدم سايح من عاليها ومن واطيها
وياللى جاى وياللى رايح المجله مش لاقيها
حبه واتلم الظنايا اللى هما البوابين
والحكايه والروايه قالهم دا كلب مين
كلب مين ما كلب مينشى سمعه لبخ حبتين
قال له واحد فيهم امشى اللى جابك عنده مين
قال دا شارع يا مواشى للجميع راكب وماشى
كلمة من دا وكلمة من دا ظاطوا واترسمت فضيحة
قول نهايته والقصد منه اسماعين شرب الطريحة
راحوا قسم الشرطة طبعا والنيابه كفيله بيهم
واترموا فى الحجر جمعا لما ييجى الدور عليهم
حبه والشاويش أمين قال سعد النقشبندى
قام غريم عم اسماعين قاله محسوبك يافندى
قام سى سمعه يروح معاه الشاويش قال غور بدمك راح تعوصني
وفوق قفاه كفه طرقع داهية فى أمك
تفتكر يفضل سى سمعه قد ايه فى القسم نايم
استضافه الحجر جمعة يابلاش ادى العزايم
شاف بلاوى ما تتحكيش والجماعة المسجونين
قال ياعالم يا شاويش يا نيابة يامسئولين
خلصوه بعد المناهده جثه من حجر النيابه
هيه يمكن ساعه واحده كان فى مكتب النيابه
قال له مالك يا اسماعين قال له زى البمب مالى
قاله عضك فوكس فين قال له سبنى اروح لحالى
انت شوف سى فوكس يمكن خد تسمم غصب عنى
الوكيل قال برضه ممكن والشاويش قعد يغنى
هيص يا كلب الست هيص لك مقامك في البوليس
بكرة تتولى في وزارة للكلاب ياخدوك رئيس
عض خلق الله وقطع لحمهم واجري وبرطع
اسماعين وزفت مين انت عند الدولة اغلى
انت تسوى في النيابة نص الف من الغلابة
طب يارت يا فوكس كنا واللا تربطنا القرابة
أنت فين والكلب فين انت قدو يا اسماعين
طب دا كلب الست يابنى وانت تطلع ابن مين
بشرى لاصحاب الديول واللى له اربع رجول
بشرى لاسيادنا البهايم من جمايس او عجول
اللى صاحبه يا جماعه له اغاني فى الاذاعه
راح يدوس فوق الغلابه والنيابه بالتباعه
